Ռոբերտ Քոչարյանն արդարացվեց 300․1 հոդվածի մասով

06.04.2021
Ռոբերտ Քոչարյանն արդարացվեց 300․1 հոդվածի մասով

Երևան քաղաքի ընդհանուր իրավասության դատարանը, նախագահությամբ Աննա Դանիբեկյանի, արդարացրեց ՀՀ երկրորդ նախագահ Ռոբերտ Քոչարյանին՝ դադարեցնելով նրա նկատմամբ Քր․ Օր․-ի 300․1 հոդվածով քրեական հետապնդումը՝ հանցագործության դեպքի բացակայության հիմքով։

Քիչ առաջ դատավորը հրապարակեց դատական ակտը, ըստ որի՝ Ռոբերտ Քոչարյանի նկատմամբ 300․1 հոդվածով քրեական հետապնդումը դադարեցվել է, և այդ մասով քրեական գործի վարույթը կարճվել է։

Դատական ակտի համաձայն՝ հանցագործության դեպքի բացակայության հիմքով սույն հոդվածով քրեական հետապնդումը դադարեցվել է նաև պաշտպանության նախկին նախարար Սեյրան Օհանյանի և ՊՆ ԶՈՒ Գլխավոր շտաբի նախկին պետ Յուրի Խաչատուրովի նկատմամբ։ Դատարանը վերացրել է Սեյրան Օհանյանի նկատմամբ ընտրված խափանման միջոց ստորագրությունը և շարժական, անշարժ գույքի ու դրամական միջոցների վրա դրված կալանքը։ Համաձայն որոշման՝ վերացվել է Յուրի Խաչատուրովի նկատմամբ ընտրված խափանման միջոց գրավը, ինչպես նաև նրա շարժական և անշարժ գույքի վրա դրված կալանքը։ Արդարացվել է նաև նախկին փոխվարչապետ Արմեն Գևորգյանը։

Քոչարյանի նկատմամբ ընտրված խափանման միջոց գրավը կամ դրա չափը նվազեցնելու վերաբերյալ միջնորդությունը մերժվել է։ Քրեական հետապնդման մարմիններին՝ Ռ․ Քոչարյանից, Ս․ Օհանյանից, Յու․ Խաչատուրովից և Արմեն Գևորգյանից գրավոր ներողություն հայցելու պարտավորության վերաբերյալ միջնորդությունը նույնպես մերժվել է։

3-օրյա ժամկետում Ռ․ Քոչարյանին, Ս․ Օհանյանին, Յուրի Խաչատուրովին ու Արմեն Գևորգյանին կուղարկվեն ծանուցագրեր՝ արդարացվածի իրավունքների և դրանց իրականացման վերաբերյալ պարզաբանումներով։

Ռ․ Քոչարյանին և Արմեն Գևորգյանին առաջադրված մեղադրանքի մնացած մասով (կաշառք ստանալու դրվագով) քննությունը կշարունակվի հաջորդ դատական նիստին, որը տեղի կունենա ապրիլի 13-ին, ժամը 13։00-ին։

Ավելին

16.03.2021

Հայտարարություն՝ «Հայաստան» համահայկական հիմնադրամի նիստի վերաբերյալ

Ես չգիտեմ՝ այս ամենն արվել է միտումնավո՞ր, թե անփութության արդյունք է, բայց փաստացի՝ հենց կառավարության գործողությունների արդյունքում լրջորեն վնասվում է «Հայաստան» համահայկական հիմնադրամի հեղինակությունը,- ասված է հայտարարությունում։

Ավելին