Ռոբերտ Քոչարյան
Ծնողները
Հայրը՝ Սեդրակ Սարգսի Քոչարյան: Ծնվել է 1910 թվականին Լեռնային Ղարաբաղի Աստղաշեն գյուղում: Ավարտել է Դաղստանի գյուղատնտեսական ինստիտուտը: Աշխատել է որպես մարզի գյուղատնտեսության վարչության պետ, Լեռնային Ղարաբաղի մարզխորհրդի գործկոմի նախագահի առաջին տեղակալ և մարզկոմի բյուրոյի անդամ: Գյուղատնտեսական գիտությունների թեկնածու, զբաղվել է գիտահետազոտական աշխատանքով, նաև հեղինակել է ԼՂ գյուղատնտեսության խնդիրներին վերաբերող ավելի քան 20 գիտական աշխատություն: Մահացել է 1977 թվականին:
«Մարդիկ գիտական աստիճան ստանալով՝ առավել հաճախ մեկնում էին մայրաքաղաք՝ Երևան կամ Բաքու: Իսկ հայրս հավատում էր, որ ինքը պետք է այստեղ՝ Լեռնային Ղարաբաղում: Եվ մեր լեռներում նա՝ գյուղատնտեսը, քաղաք-այգի էր հիմնում, կոմունիզմ կառուցում, որի գաղափարներին հավատաց ամբողջ կյանքում:»
Մայրը՝ Էմմա Արսենի Օհանյան: Ծնվել է 1926 թվականին, Լեռնային Ղարաբաղի Հադրութի շրջանի Հադրութ ավանում: Ավարտել է Երևանի անասնաբուժական ինստիտուտը: Աշխատել է Լենինավանի գիտափորձարարական բազայում՝ որպես գիտաշխատող, այնուհետև` Ստեփանակերտի տարածքային փորձարարական կայանում՝ որպես ավագ գիտաշխատող: Մահացել է 2015 թվականին:
«Տան հոգսը ամբողջովին մորս ուսերին էր: Կամային, չափավոր խիստ ու գործնական՝ նա էր սահմանում տան ներքին կարգուկանոնը, վարում ընտանեկան հաշիվներն ու զբաղվում մեր դաստիարակությամբ: Նրա վրա էր երեխաների կրթությանը վերաբերող ամեն ինչի պատասխանատվությունը:»
Ընտանիք
Ռոբերտ Քոչարյանի կինը Բելլա Քոչարյանն է։ Նրանք ունեն երեք զավակ. Սեդրակ, Գայանե, Լևոն։ Թոռները յոթն են՝ Բելլա, Անի, Էմմա, Ռոբերտ, Միքայել, Դավիթ և Զաբել։
Կինը
Բելլա Քոչարյան։ Ծնվել է 1954 թվականի հունվարի 31-ին, Ստեփանակերտում։ 1978 թվականին ավարտել է Երևանի պետական բժշկական համալսարանի Սանիտարական հիգիենայի ֆակուլտետը: Աշխատել է Լեռնային Ղարաբաղի մարզային սանիտարա-հակահամաճարակային կայանում՝ որպես բժիշկ-մանրէաբան, այնուհետև` բժիշկ-հակահամաճարակաբան: Եղել է մարզային ՍՀԿ-ի գլխավոր բժշկի տեղակալը, իսկ 1991-1993 թվականներին՝ ՍՀԿ-ի համաճարակաբանության բաժնի վարիչը: Տիկին Քոչարյանը ներկայումս զբաղվում է հասարակական գործունեությամբ՝ Ոսկրածուծի փոխպատվաստման դոնորների համահայկական ռեեստրի պատվավոր նախագահն է: 2006 թվականից Հայ օգնության ֆոնդի՝ երեխաների աջակցության կենտրոնի բարեկամների խորհրդի պատվավոր նախագահն է:
«Բելլան բացառիկ տոկուն մարդ է: Երբեք չէր տրտնջում և նույնիսկ ամենածանր պահերին լուռումունջ տանում էր դժվարությունները: Անկեղծ ու կարեկից՝ կինս միշտ ձգտում էր օգնել ուրիշներին, կարողանում էր հարաբերություններ հաստատել մարդկանց հետ ու պահպանել տան համերաշխ մթնոլորտը:»
Սեդրակ Քոչարյան
Ծնվել է 1981թ․ հուլիսի 23-ին՝ Ստեփանակերտում։ 2004թ․-ին ստացել է ԵՊՀ-ի տնտեսագիտության մագիստրոսի կոչում։ 2004թ․-ին, նույն ԲՈՒՀ-ի ասպիրանտուրայում սովորելիս, հրաժարվել է տարկետման իրավունքից և 2005-2007թթ․-ին ծառայել է ՀՀ Զինված ուժերում։ 2013թ-ին ստացել է բիզնեսի կառավարման մագիստրոսի կոչում (MBA) «Սկոլկովո» Մոսկվայի մենեջմենթի դպրոցում։
2002թ-ից զբաղվում է ձեռնարկատիրական գործունեությամբ և ներկայումս մ շարք ոլորտների ընկերություններում հիմնադիր, համահիմնադիր, տնօրենների խորհրդի անդամ և նախագահ է։ Զբաղվում է սպորտով՝ դայվինգով, լեռնադահուկային սպորտով, սնոուբորդով, նաև եռամարտով։
Ամուսնացած է, ունի երեք դուստր և մեկ որդի։ Կինը՝ Զարուհի Բադալյան։
Զարուհի Բադալյան
Ծնվել է 1981 թ. մայիսի 26-ին՝ Երևանում: 2001թ.-ին գերազանցությամբ ավարտել է Երևանի պետական համալսարանի Տնտեսագիտության ֆակուլտետի բակալավրիատը, 2003 թ.-ին` մագիստրատուրան՝ ստանալով կառավարչի մասնագիտացում:
2002-2008 թթ. աշխատել է ՀՀ Կենտրոնական բանկի բանկային վերահսկողության,բանկային մեթոդաբանության և վերլուծությունների վարչություններում՝ որպես բանկային վերլուծաբան, բանկային մեթոդաբան: 2008-ից «Գրիտտի» սպը տնօրենների խորհրդի անդամ է, կորպորատիվ հաղորդակցության պատասխանատուն։
Գայանե Քոչարյան
Ծնվել է 1983 թ․-ի սեպտեմբերի 23-ին՝ Լեռնային Ղարաբաղի Ստեփանակերտ քաղաքում:
Երևանի պետական համալսարանի Իրավաբանության ֆալուլտետն ավարտել է գերազանցության դիպլոմով: Դրանից հետո՝ 2005-2006 թթ.-ին սովորել է Լոնդոնի համալսարանում` ստանալով միջազգային իրավունքի մագիստրոսի կոչում (LLM):
2006-2007 թթ.-ին աշխատել է ՀՀ Արդարադատության նախարարությունում՝ որպես աշխատակազմ ղեկավարի խորհրդական:
Առողջ ապրելակերպի ջատագով է, զբաղվում է յոգայով, նաև վազքով և լողով:
Ամուսնացած է: Ամուսինը` Վիգեն Չատինյան:
Վիգեն Չատինյան
Ծնվել է 1984 թ․-ի հունվարի 27-ին՝ Երևանում:
2000-2005 թթ. սովորել է Մոսկվայում՝ Պետական կառավարման համալսարանի Միջազգային տնտեսական գործունեության կառավարման ամբիոնում: 2008 թթ.-ին միևնույն ամբիոնից ստացել է տնտեսագիտության թեկնածուի գիտական աստիճան:
2008-2009 թթ.-ին աշխատել է «Բարս պլյուս» ՍՊԸ-ում՝ որպես տնօրեն։ 2009-2010 թթ.-ին աշխատել է «ՀայՌուսգազարդ» ՓԲԸ-ում, 2011-2013 թթ․-ին Երևանի քաղաքապետարանում, որտեղ Զարգացման և ներդրումային ծրագրերի վարչության Միջազգային ներդրումների և այլ հաստատությունների ծրագրերի բաժնի պետն է եղել: 2013թ․-ից Sabre Travel Network Հայաստանի գրասենյակի հիմնադիր տնօրենն է։
Լևոն Քոչարյան
Ծնվել է 1985 թվականի նոյեմբերի 16-ին:
2002-2006 թթ. սովորել է Երևանի պետական համալսարանի Իրավաբանության ֆակուլտետում, ստացել բակալավրի կոչում:
2006 - 2008 թթ. ծառայել է ՀՀ Ազգային անվտանգության հատուկ մարտական գործողությունների վարչությունում:
2011-2015թ. ուսումը շարունակել է ԵՊՀ տնտեսագիտության ֆակուլտետում՝ ստանալով տնտեսագիտության տեսության մագիստրոսի աստիճան:
2008 թվականից «Նաիրի ինշուրանս» ապահովագրական ընկերության բաժնետեր և խորհրդի անդամ է։ Հայաստանի Ուժային եռամարտի ֆեդերացիայի նախագահն է:
Ամուսնացած է, ունի երկո որդի և մեկ դուստր: Կինը` Սիրանուշ Քոչարյան (Սիրուշո):
Սիրանուշ Քոչարյան (Սիրուշո)
Ծնվել է 1987թ. հունվարի 7-ին Երևանում։ Սովորել է Երևանի պետական համալսարանի Միջազգային հարաբերությունների ֆակուլտետում: Երաժշտական կրթություն է ստացել Սայաթ-Նովայի անվան երաժշտական դպրոցի դաշնամուրի բաժնում: Սիրուշոն երգչուհի, երգահան է, ՀՀ վաստակավոր արտիստ:
Թողարկել է 5 ձայնասկավառակ, 12 անգամ ճանաչվել տարվա լավագույն երգչուհի։ Մասնակցել է Եվրատեսիլ միջազգային մրցութին՝ գրավելով չորրորդ հորիզոնականը: Սիրուշոն առաջին հայ արտիստն է, ում թեկնածությունն առաջադրվել է World Music Awards մրցանակաբաշխությանը՝ Լավագույն տեսահոլովակ, Լավագույն կատարում անվանակարգերում:
Սիրուշոն այժմ իրականացնում է «Արմատ» համերգային արշավ, որի նպատակն է ամրապնդել հայկական երգն ու մշակույթը սփյուռքում։
